Gabay: Maan Iskaba daayo (Qaadka), By: Max'ed Dhagaafe Elmi |
Duhurkii markuu soo dhacoo | qaylo kor u duusho |
Qof waliba wuxuu doonayaa | inu far duubtaaye |
haddii aan danyare ahay anigu | duunyo aan dhaqanin |
dahabshiilna laysoo dhigayn | doolarkii lacagta |
doc ka tuurka barabaraha aan | laygu darajaynin |
dawo malahan oo meel xun buu | igu danbaysiine |
intaan dayday xayraami laa | maan iskaba daayo? |
| |
Doondoonistiisii adoo | daal la socon waayay |
casar dabadi uurbeys haddii | lagula soo doonto |
derintiyo sigaarkaba markii | aad dabbari wayso |
degi maysid oo shaahi baa | kaaga sii darane |
darmuus uu nin iibsaday intaad | koob la daba joogto |
dawo malahan oo meel xun buu | kugu dambeysiine |
dawarsiga intaan baran lahaa | maan iskaba daayo? |
| |
Adigoo dorraad cunay shalana | calafku kuu diiday |
haddii maanta lagu daba marshoo | dani ku seegsiiso |
durba seexan mayside wax baa | diiddan gama'iiye |
dubaab aadan arag iyo dhilqaa | diirka kaa xuliye |
belo aan la daalacan ayaad | dila tiraahdaaye |
war duqii ma waasheey ku oran | dariska kuu dhoow e |
Jin intaan dagaallami lahayn | maan iskaba daayo? |
| |
Berri baan dabbarayaa haddii | lagugu sii daayo |
asaad doorka doorkiisa kale | soo dallici wayso |
dukaan baa la xiray iyo la diid | daynta iga dhawre |
dumarkiyo raggaas iibiyaa | waa dir dhegaloode |
inkastood darroorido dheguhu | uma daloolaane |
dacallada nin suuq lagu dhegana | waa damiir xumiye |
intii sharaftu iga duuli layd | maan iskaba daayo? |
| |
Cibaado iyo diin seeg nin qaad | dabada haystaaye |
daruus iyo tacliin waa horey | kala dalaabeene |
inkastoo daruurtiyo marqaan | dayaxa gaarsiiyo |
dib ayuu shallaayaa markuu | daanka mariyaaye |
dariiqyada ayuu uga go'aa | deymihii hore e |
dulligaas intaan qabi lahaa | maan iskaba daayo? |
| |
Dadkoo seexday layl-dama ayaad | dibadda meertaaye |
waxaad daris la noqotaa intii | doorsan aadmiga e |
daryankiyo sarqaankaad la tahay | ul iyo diirkeede |
ilaa waagu daalacana waad | wada dikaantaane |
haddii aan Dil dhicin oon midkiin | meesha lagu dooxin |
wixii diintu diiddiyo sinaa | lagu danbaysiine |
intii aan dibbood noqon lahaa | maan iskaba daayo? |
| |
Kolkii ay dareeraan ardadu | oo dugsiga aaddo |
daakiraadda waaberi markii | shaqo la doondoono |
dadabtii ilmaha laga kacshaad | dib ugu guurtaaye |
ilaa uu kan kale soo degana | waa dug xaajaduye |
duqda lagu hallayn reerka oo | howsha lagu dayni |
dullaa laga dhaxlaa biilki aad | dumar ka dhowrtaaye |
intii aan dayici laa xilkay | maan iskaba daayo? |
| |
Haddaad daaqdo qaadkood misana | deynba kari wayso |
dadku kuma ciseeyoo dhammaan | waa ku durayaane |
dawdar iyo waxay kugu xusaan | danihi ruux mooge |
dunna laguma aamino ninkay | dadartu waashaaye |
adigoo Da'weynoo cirradu | dayrtay madaxaaga |
dukaankii ad dalab ula tagtaa | diiday buu orane |
intii aan damiin dayi lahaa | maan iskaba daayo? |
| |
Waxaa lagu daneeyaa intaad | duunyo leedahaye |
haddii aad dalaaftana ma jiro | ruux ku dayayaaye |
mar hadduusan diintii ilaah | kugula doodaynin |
saaxiibka dunidaani waa | daanka igu raace |
ninkii aadan qaadkiisa dirin | ways dibbiriyaaye |
maxaad ii debbari wayday buu | kuugu dudayaaye |
mooryaan intaan dumi lahaa | maan iskaba daayo |
| |
Dumar lagama maarmee middii | calafku kuu dooro |
haddii waalid kuu doono oo | laydin darajeeyo |
oo daarcad laydiin goglood | kula damaashaaddo |
durbaan iyo mashxarad iyo kolkii | gaaf la diriteeyo |
aroos laguma daahee markii | la isu kiin daayo |
qaaddiro ninkii daallanaa | doorki gudan waaye |
intii aan Dab-yare noqon lahaa | maan iskaba daayo? |
| |
Ilkahoo ku daatiyo afkoo | daasad noqonaaya |
muuqaal-darnaan kugu dhacdiyo | midab ku doorsooma |
madaxoo ku diirmiyo tintoo | badiba kaa duusha |
durey aan marnaba kaa baxayn | daa'in abidkaaba |
dalanbaabi socodkoo noqdood | saan daldali wayso |
dabeecadaha qaad weeye iyo | degalladiisiiye |
derbi jiif intaan noqon lahaa | maan iskaba daayo? |
Tix-raax: www.Qaaddiid.com
|