Hooyo-macaan, Abwaan Bulxan |
01. Abaqaalki koobaad markii aadan laga beermay 02. ddubkii labaad wuxu ahaa xaawo unuggeede 03. abuurkeeda dhoobada rabbigay kama astaysiine 04. ahaw baa la yiri feedha bidix aadan laga jeexye 05. xigmad eebbe weeyoo kalgacal laga arkaayaaye 06. aqalkii bilow-aadanaha unuggi weeyaane 07. ubad faraxle eebbahay ka beer urur mataanaaye 08. si uu taranku u ebyoomo oo loo aflaxo waasac 09. is-dhaafsada la yiri inamihii farax arooseede 10. arrimihii ka xaasilay nafluhu wuu ogsoon yahaye 11. hayeeshee ujeedkaygu waa hooyo eraygeede 12. an asteeyo aqoon gaabniday maan idlayn karo e 13. Afku kama qisoon karo inuu sheego amarkeede 14. axwaalkeeda quraankaa akmilay aynigay tahaye 15. addimadeeday hoos taal jannadi udugga weynayde 16. addeeceeda iyo kii allaa lays ag dhigayaaye 17. saddex darajo aabbaha ka weyn waanad aragtaane 18. koomkaan allihi uumay baa aayaddaa yiriye 19. rasuulkuna ishaarada ku sheeg aynigay tahaye (SCW) 20. eedaadka dhibkay soo martiyo urugadii taaha 21. wallacay rafaad uurka guba la anfariirtaaye 22. ubucday ku qaaddaa sagaal bilo ayaameede 23. fooshii inkaarnayd wadkay iil qarkii tagiye 24. sakaraadkay aragtaa xanuun la alwanaysaaye 25. miyirkiyo xiskeedaa ambada arami kaarkiiye 26. markii eebbe kala keeno oy oohintaa maqasho 27. farxad aan idlaan bay kalgacal kugu iqbaashaaye 28. ibtilooyinkay soo martay wada illowdaaye 29. ibihiyo waxay kuu dhigtaa naas irmaan jaqide 30. markaad oydo kuma eegatee aamus bay dhihiye 31. araxdoy ku saartiyo hees bay kugu ammaantaaye 32. qosalkaagu goortuu u baxay oogsataa faraxe 33. musqul oogadeedaa ah iyo tuuji aabburane 34. mataggaaga kama aafatee aastay dhaqidiiye 35. afkeeday ku dhuuqdaa sankoo cabbur ku awdaaye 36. nafteedoo asqawday adiga uurka kuu miliye 37. adoon dhereg afkaa iman ogow oontu waw dacare 38. ambaqaadka socodkii kolkaad aayar hidinayso 39. istaaggaaga keliyawga wacan uunka oo idile 40. af billowga erayada gurracan oraah caruureedka 41. iyadoo quraa garan kartoo eebbahay baraye 42. itaal yarida tabartii markaad hooyo u adeegto 43. il raxmaad ayay kugu daydaa kugu iqbaashaaye 44. farax uurka buuxshana qalbigay kuugu ebidaaye 45. adigay adduunayada dhammaan siisan araggaaye 46. ilwaad iyo udgoon baad u tahay aayatiin jira e 47. jirradaad ildaran tahay xanuun oogadiyo jiirka 48. alwadkaaga taahawga daran iil in loo qodo e 49. indheheedu jiif kama bogtaan uurku waa gubane 50. haddii ay awooddana naftay kuu ergi lahaye 51. arwaaxeeda noloshiyo farxadu adiga weeyaane 52. calooshaaday eegtaa niyaday kaa afgarataaye 53. cunto inad rabtiyo oonka way kala ogaataaye 54. hadaaqaaga iyadaa taqaan eray billowgaa e 55. axad kale magaran karo qof aan shayna oranayne 56. hooyaduse waa ababiyaha koonka oo idile 57. waa axadka kaliyeen raxmadi ka ag dhammaanayne 58. waa hoyga noloshee farxadi ka ambaqaaddaaye 59. waa awr hayina iyo sariir aad ku gama'daaye 60. waa tiirka aadmigu cuskado udub dhexaadkiiye 61. albaabbada jannada laga galiyo waa rug aaminahe 62. aayaad axaadiis wuxuu eebbe ugu sheegay 63. amarkeedu inu weynyahaa nala ogaysiine 64. axadkii ku caasiya cadaab ways arkahayaane 65. acmaal khayr leh haddii aad fashoo faralka aad oogto 66. ama aad xajkii aaddo ood gudato awqaafta 67. hooyadi-eryaha erayga kulul kula ataagaaya 68. caasiga inkaarani jannada wuu ag marayaaye 69. ololkii cadaabkaa uqoran iilka wuu gubane 70. abaal-dhace wixii lagu akmilay ka indha taagaaya 71. ee abaydinnimadii inkiray tiil awood li'iye 72. oogadiisa muruqyada midkaa abadan moodaaya 73. aqli xumaha islaanyahay na daa ku asaraaraaya 74. eray liita eeyaa qofkii hooyo oranaaya 75. muran iyo akeekamid midkaan kala ajoonaynin 76. afgaroocu weligii ma helo eray wanaaggiise 77. arxan laawe hoygiisu waa olol jaxiimaade 78. ma aflaxo abiidkii sharwade caasi eed galaye 79. ibihii ad nuugtiyo dhabtii abaxdu kuu tiillay 80. araxday ku saartiyo dushaad ku istareexaysay 81. aqli-laawe ruuxii inkiray eedyay jeer kale e 82. ihaaniyo dhibbuu la kulmayaa lama illaawaane 83. ina hebel waxaad tahay intaad dunida joogtaaye 84. aakhiro isimka hooyadaa loo abtiriyaaye 85. inkir malaha waxay aayad tiri ama axaadiise 86. amarkeeda waa layna faray inaan addeecnaaye 87. Da'du markay asiibtee xanuun, aafo soo ridato 88. markii ay awooddii gabtoo oogadii dabacdo 89. agaasimid dhaqaalayn leh iyo eray turriinshiiyo 90. af macaan aqbalay iyo wanaag lagu adeegaayo 91. adigoon dhibsanahayn shaqada aad u qabanayso 92. ahmiyadda ujeedkaagu waa eebbe ka cabsoo e 93. ajar weyn ayaa laga dhaxlaa aakhiraad heline 94. u ixsaan fal iyaguba siday kugu ahaayeene 95. alaakoodintoodii horiye aaya korintaadi 96. alif barashadaadii ilaa baqara aad gaartay 97. intaasay adduun kugu lunsheen aar ayuu noqone 98. quruxdiyo ilwaaddaani waa ababintoodiiye 99. arbe maad ahaateen haddaan lagu aleelayne 100. ha is moodin amiir boqora iyo geesi aaminahe 101. idif baad lahayd iyo dhareer sebi ahaantiiye 102. indhal meel la dhigay baad ahayd oon awood qabine 103. ummi garasho daran baad ahayd eray aqoontiiye 104. uskaggii markay kaa dhaqdaad abab wacnaataaye 105. shuushaamintaaday dadaal kugu itaashaaye 106. arrad-bixin aqool bay intaa kula ag joogtaaye 107. gaal iyo islaan kaad ahaan waalid waw araxe 108. ustaad baraha koowaad aflaxe iyada weeyaane 109. ujro kaama doontiyo wax siin aanafiyo quude 110. abaal uga dhig eebbow jannada wa'ad awooddaaye. By: Abwaan Bulxan. ------------------------------------------- Maxamed Cabdi. aamaguul@hotmail.co.uk |
© All Rights Reserved aamaguul.com | Contact: webmaster@aamaguul.com | Designed by Mhmd aamaguul.