Mana gudan xilkaagii , mana gabin xaqaaqii 
xusuustana ma moogiye, xujadaada weyn baan 
xag aan kaga hagaagiyo, xeeligeegi la'ahaye 
saddex-goor-xaq-mudaneey, xinjirtayda dhiiggaay 
xaramkii labaadeey, xaaska haybaddiisaay 
xag alliyo dhankaagay, qudhu igaga xidhan tee 
la'aantaa xayaatada, xabaal baan ka gali laa. 

Xadhkihii sammaantiyo, heeryadii xaqiiqada 
xajisee adkaysaay 

Qof xannaanadaadiyo, xiisahaaga waayaa 
xagal-daac ka bixi waa, xiskiisuna ma buuxsamo. 

Xayn-daabka guushaay, xaruntii aqoontaay 
hal-abuur xuruuftiyo, xarakeeya maansada 
adigaa xanjaadkiyo, hooyo xaynka ku af bara 

Deeqsi xoolo badanoo, xaasidnimo ka saahiday 
adaa xeerka soo bara 



Hablo xuural-cayn ee, xariir guudka loo dabay 
xulantida la tiigsado, adaa xoor ku soo habay
u sii xaadhay daw siman, misna faray xuduuddiyo 
inta laga xishoodiyo, inta aan xajiin iyo 
xumo lagu ogaynee, garashadu u xilatee 
xusul-duubka raadcada, xergi loogu baratamo. 

Markuu xoolka jiifiyo, markuu xoogga leeyahay 
xildhibaanka uunkani, la'aantaa xal-keennaa 
Xero oodi kari waa. 

Xarumaha caloosheed, hooyo igu xamaashiyo 
xanaf iyo kulayl iyo, xanuun fooshu leediyo 
qaydkiyo xansheerkaad, wallee igu xambaartiyo 
xaqii naaska maba gudo. 

Xiskaygaad ku milantoo, xididdada hal-bawlaha 
xinjiraha u qaadiyo, xubnahayga oo dhami 
xaqa aad ka mudantahay, ku xadraynayaanoo 
inta xay aad tahay baan, xurmayntaada qaanta ah 
xirib qudha qiyaas le eg, xilbax inan ku soo gudo 
ku xisaabtamaayoo, haddaan xoog u leeyahon 
xayiraayo dhiillada, xanuun iyo bukaan iyo 
xumo maabad aragteen, anigaa xawilan laa 
dhibta kuu xammili laa. 

Xushmayntaada ruux gabay, xaq-dhawrkaaga baal maray 
ma xasilo adduunyada, xawdkii rasuulkiyo 
janno waa ka xaaraan. 

Qof xeerkaaga sheeg yidhi, xudduuddiisa gaadh yidhi 
ku xabeebsay mooyee, xusul qudha dhamayn waa 

Anna xarafka maansada, nabarrada xanuunka le 
ku xaraari mooyee, xaasha’e is maan odhan 
xaqa hooyo leedahay, carrab baa xaddidi kara! 

Xudduntaan ka beermaay, xujadii adduunkaay 
xog ogaalka dhaqankaay, xildhibaanka noloshaay 

inta xidid ku nool yahay, xagtintiyo dhibaatada 
xayn daab biroo adag, xijaab aan la mari karin 
kaaga xeeri mawluhu 

Rabbigay xabaashana, xaraaraha fardawsaada
xaadin kaaga qoondee, anna xiise duuggiyo 
dareen xaaluf-diidiyo, xadantiyo kuu xalan 
waa mid aan la xadi karin. 



By: Abwaan Xasan Daahir Ismaaciil
---------------------------------------------
Maxamed Cabdi.
aamaguul@hotmail.co.uk